إسفنجتي الخارقة

تعرفي الاشياء اللي تكتشفيها بعدين تقولي يالله فيني عنها من زمان... البيوتي بليندر من هذه الاشياء 

شي واحد ممكن يغير من روتين وشكل مكياجك كله 

و تخلي وقت المكياج مرا اسهل بكثييير..

مافيه معاناة في التوزيع..غير انها تخلي توزيع الأساس ممتاز ع البشرة 

بشكل متساوي تماماً وتمتص الزايد منه..

 احس كلامي كأنه دعاية راديو 

لا من جد صارلي  استخدمها اكثر من سنتين ..وعملت فرق جذري والآن مااستغني عنها .. 

 طلعت إسفنجات كثير من شركات تجميلية ..وسبق جربت أكثر من وحدة من ماركات أخرى لكن أبداً ما كانت ممتازة زي  بيوتي بليندر فلا تفكري  بغيرها.. 

نفس الشركة طلعت منها اكثر من حجم .. شي للأساس وشي للكونسيلر والزوايا

انا اخذت وحدة بس.. وهي المخصصة للأساس و استخدمها في الأساس و الكونسيلر وماشية معايا زي الفل 

طريقة استخدامها : 

دائماً قبل الاستخدام بلليها أو رطبيها بالماء وراح تكبر بشكل ملحوظ .. كذا تكون جاهزة للأستخدام

ولما تحطي الأساس أو الكونسيلر طبطبي ع البشرة بالإسفنجة  مو تمسحي .. اعتمدي ع الطبطبة

بعد فترة راح تحتاج للتنظيف ..

و تنظيفها زي باقي الفرش ..اشطفها واحط غسول الفرش ( انا استخدم الغسول من شركة ايلف ) وتنشف بسرعة ..

بعضهم يحطوها في المايكرويف نص دقيقة أو أقل ..تقتل كل البكتريا والجراثيم .. انا ماجربتها لكن نفعت مع الكثير ..

اهممم شي لما تشتريها اتأكدي انها الأصلية..

اخذتها من سيفورا هنااا

وسلامتكم..