2015-10-07

❤️‍ منتجاتي المـفضلة للعناية بمولودي الجديد







تدوينة  أرجو أن تكون مفيدة  لكل أُم جديدة... أو بإنتظار مولود جديد
...

من أكثر الأشياء التي أفادتني أثناء تجهيزي أغراض البيبي ..

 هي بعض التدوينات والفيديوهات لتجارب الأمهات لمنتجات المواليد و الحاجات المهمة لهم
وبما انها كانت التجربة الأولى لي كنت متحمسة
 و اشتريت اشياء كثيرة ..البعض أفادني لكن بصراحة كثير منهم ماكان له قيمة..
وبعضها ما احتجتها و لا استخدمتها اصلا.
لذلك حبيت أكتب في هذه التدوينة عن أكثرالمنتجات اللي استخدمتها لمولودي خلال 

الشهرين أو الثلاث أشهر الأولى من حياته..




 بالنسبة لي هذه المنتجات أصبحت ضرورية و إستخدمتها بكثرة  خلال الأشهر الأولى   ..

  لن أتطرق للأشياء الأساسية الضرورية المهمة زي عدد الملابس والحفايض وهذه الأمور 
 بل في هذه التدوينة سأعرض منتجات قد تكون كمالية لبعض الأمهات ... 
لكن برأيي أنها منتجات مهمة وجديرة بأن تكون  في قائمة التجهيزات لمولودك الجديد 

والحقيقة على أنها أفادتني جددداً إلا إني ما شفت أحد ينصح فيها ومو معروفة عند الكثير..
 و كل كلامي ونصائحي هُنا عن تجربة..














1_ أكياس النوم أو sleeping bag


من أكثر الأشياء اللي درست عنها في تخصصي (children development)
هو الموت المفاجئ للأطفال خلال السنة الأولى ..نسأل الله السلامة والعافية لأطفالنا...
وهوَ إختناق الطفل وتوقفه عن التنفس مما يسبب الوفاة.
 والتوقف عن التنفس يكون لأسباب مجهولة وغير واضحة ..
 مو بالضرورة يكون فيه شي على وجهه..والإحتياطات كثيرة بإمكانك أن تبحثي في هذا الموضوع
فالمقالات والدراسات فيه كثيرة.لكن هذا الشي خلاني أخاف مرا من إنو الطفل ينكتم ... 
و حاولت آخذ الإحتياطات اللازمة للتقليل من نسبة التعرض لها أو من خطر إنو ينكتم بشكل مباشر ... 

لذلك أنا ما أستخدم المريلة أو الصدرية للطفل ..
 لأنو كثير من الأمهات يغفلوا شويتين عن الطفل ويرجعوا ويحصلوا المريلة مقلوبة على وجه البيبي.
أيضاً البطانيات من الأشياء اللي كنت أحرص منها.. أنا شخصياً صارت معايا :(
رجعت لقيتها على وجه ولدي ومررررا خفت .. و الحمدلله ربي لطف..

بس من بعدها أتعقدت وما صرت أستخدم البطانية وقت النوم أبداً
 واستبدلتها بهذا المنتج الجميل وحبيتو مرا اسم المنتج في السوق (sleep bag) ..
 تؤدي غرض البطانية أو اللحاف  لكن تتقفل بـ سُستة .. 
يصير مستحيل بإذن الله إنها تجي على وجه البيبي.في منها ألوان وأقمشة  مختلفة ..
استدليت عليها من المستشفى كانو يستخدموها لطفلي لما ولدت فما ترددت إني أشتريها..
و ريحتني مرا الحمدلله صرت ما أقلق كثير في هذا الموضوع خصوصاً وقت نومي ..
 في النهاية و الأهم .. مع أخذ إحتياطاتك في هذا الموضوع  أهم شي دائماًإحرصي على الأذكار
وإستودعي الله طفلك و توكلي عليه...










2_  بربتوز مع قفاز أو غطاء لليد 

كما هو واضح في الصورة .. غطاء اليد أو القفاز موجود ومفصل في البربتوز ويكون منه و فيه 
فيجي مرتب مرا في اللبس وعملي جداً.المواليد يخربشوا ويجرحوا نفسهم بأظافرهم كثييير

راح تستغربي ماشاء الله من طول أظافر يد طفلك و إنها تطول بسرعة لما تقصيها
بالنسبة لي قَص الأظافر للبيبي رعبببببب  و ماما ماكانت عندي ولا كان عندي أحد عنده خبرة عشان يقص أظافر ولدي .. 
 فجلست أول شهر تقريبا ما قصيت له أبداً

لذلك هذه البربتوزات نفعتني كثيييير في إنها تحمي البيبي من إنه يجرح نفسه
كمان مفيدة إنها تدفي وتغطي اليد..فإذا إنتي على اي حال  مشترية بربتوز...
إحرصي يكون فيه هذا القفاز أو الغطاء لليد..









3 _Nose Frida أو منفظة أنف الطفل 

تنظيف أنف المولود الصغير مهم جداً ..
 لأنو وقت الرضاعة يعتمد عليه في التنفس ..
لكن تنظيفه من أصعب المهام اللي تواجهها الأم ..
 وكمان الطفل يتضايق  لما تحاولي تنظفي بيدك
  و بعض الأحيان ممكن تجرحيه..

فهذه الآداة أفادتني إلى حد ما...

طريقة إستعمالها بسيطة ..

 و هي إنك تحطي الأنبوب قريب من أنف الطفل و
تشفطي إنتي من المكان المخصص في الطرف الآخر ...

وعشان تسهلي العملية أكثر أنصحك تحطي قطرة أنف ..

أنا أمسّح الأنف بالمناديل المخصصة للأطفال المواليد اللي تحتوي على قطرة أنفمسحة خفيفة و بلُطف تكفي ..
النتيجة مو مذهلة مرا  وبعض الأحيان أنا كنت أتعب من الشفط 

لكن عموماً هي أفضل ومجدية أكثر من إستخدام يدك 
و إذا لقيتي منتج أحسن منه يؤدي نفس الغرض خذيه ..لكن أنا مالقيت غير هذا 










4_ علاج  المغص و الغازت 

يتعرض المولود  للكثير من الغازات ..
 راح تلاحظي كثرة الأصوات منه و هذا شي طبيعي ..أنا أفتكر في البداية أتفاجأت لكن قالتلي الدكتورة
 إنو الأطفال في بداية حياتهم يعطسوا كثير و تجيهم
 (حازوقة) أو (هيكابس) كثير و كمان يتعرضوا للمغص والغازات.


أهم شي إحرصي إنك تتفادي كثرتها بإنك  "تكرعيه " بعد الرضعة على طول أول بأول  .. 

و إذا بكي كثير كمان "كرّعيه" أول ما يهدأ لأنو وقت البكاء يكون دخل هواء للبطن ..
لذلك هذا  الدواء ضروري جداً يكون عند كل ماما جديدة راح تلاحظي
إنو طفلك يكون متضايق وتخرج بعض الأصوات وقد يكون يبكي ومو مرتاح وقت النوم الين مايخرج الغازات ..

فهذا المشروب يساعده ويسهل العملية..

و بالمناسبة هو آمن للمواليد وما يحتاج وصفة من الدكتور 
ريحني جداً والمهم إنو ريّح طفلي كثير ..و المفعول سريع جداً..
بمجرد أعطيه لولدي يرتااااح مرا ..

إحرصي يكون عندك من قبل ماتولدي ..يصير في أي وقت يحتاج البيبي هذا المشروب

 على طول تعطيه وماتحتاجي ترسلي أحد الصيدلية وتنتظري ..

لأنو أكثر شي عرفتو لما ولدت طفلي إنو الإنتظار صعب صعب صعب..
كأُم .. أول مايبكي طفلي أو يعاني من شي أبغى أوفر له الحل على طول.. 
وكل مازادت مدة الإنتظار هو يتعب ويتنكد أكثر وأنا أتعب أكثر..  :(
   فإنك تجهزي أغراضك وتجهزي لهذه الحالات ح يساعدك و يريحك كثيير..
و بالمناسبة .. أنصحك لا تعطي طفلك أشياء شعبية زي ماء غريب و أعشاب .. لأنها أثبتت ضررها في كثير من الحالات
والدواء هذا مصرّح فيه من قِبل اكاديمية أطباء امريكا فإختاري المضمون أفضل ..








5_ حفايض المواليد مدعمة  بخاصية مؤشر البلل أو (كشف التبول) 

في أول أيام حياة طفلك مهم جداً إنك تتابعي عدد مرات تبول الطفل وخروج الفضلات ..لأنه يحدد إذا الطفل يتلقى التغذية الصحيحة أو لا.

خروج الفضلات الكبيرة  واضح مايحتاج  .. لكن بالنسبة لي..
كنت ما أعرف إذا تبول أو لأ..
أو أكون شاكة خصوصاً إنو في البداية يكون كمية قليلة وبدون رائحة فـ وفرت لي المستشفى  هذه الحفايض ..
إذا تبول الطفل يتغير لون الخط من أصفر إلى أزرق .. مفيدة جداً 

وكمان بعضها تجي مقوسة من فوق عشان ماتقفلي ع السرة يصير تحميها من التعرض للفضلات..
فـأنصحك إنك تآخذي هذه النوعية من الحفايض لأول أسبوعين ع الأقل..
رابط المنتج في امازون :  Pampers









6_ برنامج متابعة الطفل

كمان من الأشياء اللي أفادتني في إني أتابع عدد مرات خروج الفضلات هو هذا الآب الموجود في آبل ستور في الايفون Baby tracker 
البرنامج جميييل جداً ومفيد لأبعد حد.

بعض الأُمهات يستخدموا القلم و الدفتر لمتابعة عدد رضعات الطفل
 و من أي صدر آخر مرة رضع وعدد الحفايض هذا الآب بديل للقلم والدفتر ..
 وأفضل بالنسبة لي عملي جداً ودائماً معاك .. 
 بإمكانك تخزني بطريقة سهلة و واضحة وقت الرضعة وتحطي الموقت يصير يحسب
 المدة اللي رضع فيها طفلك و في أي صدر .. 
تسجلي فيه كل مرة تغيري الحفاضة ويسألك إذا كانت بول أو فضلات أو الأثنين.. 
كمان تسجلي وقت نوم طفلك .. 

بشكل عام يصير متابعة صحة طفلك أسهل والمهم إنها صحيحة ودقيقة أكثر .. 
أنا أفادني في مراجعات طفلي لأن الدكتور يسأل في كل مراجعة عن هذه المعلومات..




 



7_ جلاسة & سرير هزاز   Rocking Bassinets 

     من بين كللل الأشياء اللي ذكرتها ,هذا المنتج  من أهمهم.


من أكثر الأشياء اللي تهدّي طفلك و تخليه ينام بسهولة و لعدد ساعات أطول

هي الهزهزة  أو الأرجحة البطيئة لأنها تُشعره أنه مازال في رحمك..

و هذه القاعدة أو السرير تقوم بهذا العمل ..كل اللي عليك إنك تختاري احد القطعتين..
وتحطيها ع القاعدة

و تضعي طفلك عليها.. وبعدها تختاري درجة السرعةوتعمل ع الكهرباء أو البطارية العادية 

تجي 3 قطع.... قاعدة و جلاسة وسرير..  تغيريها على حسب حاجتك و بسهولة تامة.. 
وفيه درجات ومستويات للسرعة وفيها أيضاً أصوات طبيعة و موسيقى..
أحياناً اشيل قطعة السرير من القاعدة وأحطها في سريري ...
يصير طفلي ينام معايا في نفس السرير بأمان وبدون مخاطرة إني ممكن أكتمه أعوذ بالله
عموماً هذه التقنية صارت موجودة كثير في السرر والجلاسات ..
وهذه عجبتني إنها جامعة الإثنين مع بعض..
أول ماولدت كنت أستخدمه كسرير هزاز  فقط..
حطيتها جنب سريري لكن صراحة ما كانت مريحة لي أنا ..
 لأن طولها أقصر من سريري  والسلة نفسها عميقة ..
 فكان متعب كل مرة ادنق وآخذه.. لكن تأقلمت بعد مدة لأنها مريحة للبيبي وهذا الأهم عندي..
و بعدها بشهر تقريباً صرت أستخدم الجلاسة كمان وأبدل بينهم حسب ما أحتاج.
لكن دااائماً أحطها على درجة سرعة واطية لأَنِّي أخاف تكون سريعة جداً على رأسه وهو مازال صغير ..
 وما يحتاج سرعة عالية عشان يرتاح وينام..
 سرعة خفيفة تكفي.القاعدة فيها ٦ درجات للسرعة .. أنا أقصى شي أوصله للآن  هو ٣ ..
لكن فعلاً أنصحك فيها .. و فعلاً تستاهل كل ريال.
أحيانا ولدي يصحى في الليل ويكون بس يحتاج هز بسيط وأكون أنا من جد تعبانة ..
خصوصاً بعد الولادة يكون صعب عليك القومة  و الوقوف بسهولة فهذه تسهل عليك وعلى طفلك الكثير ..
أخذتها من هنا...








8_ كتب عن الأطفال المواليد

 مهم جداً يكون عندك مرجع علمي موثوق في الرعاية أو العناية بالطفل

هذه الكتابين من أفضل الكتب اللي قرأتها في هذا المجال...

نفعوني جداً لأَنِّي كما ذكرت ماكان عندي أحد ذو خبرة يساعدني فواجهت كل شي وحدي 

ومن غير هذه الكتب ما أعرف إيش كنت راح أعمل الحمدلله اللي إستدليت عليهم.


الكتاب الأول  ( Your Baby's First Year Week by Week)  : 

يعطيك نبذة عن كل أسبوع في حياة طفلك .. 

من اليوم الأول إلى عمر السنة كل أسبوع يكتبلك عن إحتياج طفلك هذا الأسبوع 

وعن النمو العقلي والعضوي والتغييرات اللي المفروض تلاحظيها ..

حتى عن بعض الألعاب الممكنة مع المواليد

 و الأشياء اللي تشد إنتباههم..يعلمك خطوة بخطوة

حتى عن الأشياء البسيطة كتغيير الحفاظة وتحضير الرضاعة و كيفية تحميم الطفل .. 


 كل أسبوع أقرأ جزئية الأسبوع المقبل ..

فأكون على إستعداد لكل إحتياجات طفلي للأسبوع وعلى علم بالتغييرات الجديدة ...

فعلاً هذا الكتاب أفادني جداً ..
أشياء كثيرة كنت راح أخاف و أقلق لو شفتها في ولدي و أنا ما قرأت عنها .. و أشياء كثير كنت ماراح أعرف أسويها وأحوس وأتعب نفسي و ولدي ..

 لذلك المعرفة والقراءة في هذا المجال تريحك إنتي في المقام الأول وتريح طفلك فلا تفرطي فيهافحاولي تقتني هذا الكتاب أو أي كتاب نفس الفكرة ويكون موثوق فيه طبياً.


الكتاب الثاني (The Happiest Baby on the block):

كتاب يتناول الرعاية النفسية للمولود و الرعاية النفسية للمولود 
تتلخص في إنه يشعر بالآمان وينام مدة أطول ويتجنب نوبات البكاء.


وهذا الكتاب يساعدك في إنك تحققي هذه الأشياء بالتالي
 زي ما قلت إنتي أكثر وحدة راح ترتاحي لما تتعلمي كيف
 تطبقي هذه الأشياء على مولودك الجديد
 يصير تنامي مدة أطول وتآخذي الراحة الكافية خصوصاً أيام الأربعين
 لذلك مهم إنك تنتهي من قراءة الكتاب قبل الولادةيصير تكوني على أتم الإستعداد في أول يوم من حياة طفلك. 

 الكاتب طبيب الأطفال المعروف (هارفي كارب ) عنده نظرية شيقة جداً أثبتت فاعليتها مع المواليد ...

 أنا شخصياً طبقتها على طفلي وفعلاً طفلي مايتعرض لنوبات البكاء بفضل الله ثم بفضل هذا الكتاب أعتقد

راح أكتب عنه ملخص وأطرحها في المدونة بإذن الله لأنه من أهم الكتب اللي قرأتها و لأن من جد راح تفيد كل ماما..





......

كانت هذه أهم المنتجات اللي استخدمتهم وحبيتهم و أقترحهم ع المامات الجُدد..
أو إذا تبغي هدية حلوة لصديقتك الوالادة..خذيلها من هذه القائمة
و راح تدعيلك.. 




في النهاية أحب ألفت إنتباهك لشيء مهم قد تغفلي عنه في زحمة تجهيزك لأغراض مولودك الجديد ...
هوَ إنك إنتي تجهزي نفسك قبل كل شيء ..


الأهم من كل هذه المنتجات المادية هو حضورك العقلي والجسدي لصغيرك..
تذكري دائماً ... إحتياجات صغيرك النفسية لا تقل أهمية عن إحتياجه للأكل والنوم..
و تذكري دائماً ...اذا ماكان بإمكانك ان توفري بعض هذه المنتجات لا يعني إنك مقصرة
لا..هذه المنتجات تريحك إنتي و تسهل لك العناية بصغيرك ..
فلا تشعري بالتقصير اذا لم تتمكني من توفيرها... (بإستثناء الكتب والمعرفة طبعاً!)



أخيراً هذا كل ما عندي لهذه التدوينة ..
إذا كنت تقرأي هذه التدوينة فالأغلب إنك بإنتظار مولودك الجديد  

أدعو الله لك بالسلامة  والسعادة ويرزقك الطفل السليم المعافى يارب ..

و هنيئاً لك أجمل مشاعر وأجمل أيام عمرك بإذن الله ..

تعليقك سيُسعدني جداً 





1 comment: