في تدوينة اليوم أبغى أشارككم أجمل الأشياء اللي أنا حابتها و أدمنتها بكثرة هذه الفترة... هي أشياء عشوائية .. من كل مكان مو فقط تجميلية. أتمنى تجربوها لأنو انتقيتها بعناية واخترت الأشياء اللي أنا من جد حابتها...
1_ مرطب نيتروجينا هذا مرطب وفيه واقي شمس في نفس الوقت نفعني جداً .. قبل فترة حسّيت انو بشرتي جافة لدرجة متقشرة خصوصاً في فصل الشتاء
التي زوون " اللي هي الجبهة امتداداً إلى الأنف T " تكون معدومة.. المهم انو جلست أدور على اي شي يرطبها لي ترطيب عميق وفي نفس الوقت ماأبغى بشرتي تبان "مزيتة" ولقيت هذا أخذتو بدون مدح من أحد أو أي شيء وما أعطيتو إهتمام لكني كنت أستخدم المنتج يومياً
لأنو شكل بشرتي جافة كان يزعجني فـ على طول اروح واحط منو.. لكن بعد فترة من الإستخدام لاحظت انو فعلاً فعلاً بشرتي تحسنت ..
وراحت الأشياء اللي زي القشرة ومرا ارتحت فيه الصراحة ..
الآن أنا معتمدة عليه تماماً على الرغم من إني وصلت للنتيجة المطلوبة لكن ماعندي الشجاعة اني اتركو لسا هههه وصرت استخدمو قبل المكياج وكمان انو فيه واقي للشمس ريحني مرا..
والعلبة ملياااانة يعني تعيش عندك تستخدمي منها وماتخلص أسعدني هذا المنتج ومن جد حااابتو لكن أهم شي الإستمرارية في الإستخدام.
2_ روج "Be Legendary" ماركة Smashbox مايحتاج كلااااام الصورة كفااااية حبيت جداً جداً جداً اللون مررا دخل مزاجي ومن ناحية الجودة ارواج سماشبوك بشكل عام مرا جيدة .. مو مرا مات ناشفة ولا تسيح ع الشفايف كمان .. يعني ممتاز.. لاحظت انو الغطاية مو بسهولة تنفتح ..مو زي باقي الأرواج ..لازم تجري شويتين عشان افتحيه وكان يقهرني لكن بعد مارحت عند اهلي و اترك مكياجي ع التسريحة ..ارجع ألاقي أخواتي الصغار لاعبين بمكياجي إلا هذا الروج الوحيد اللي ماانفتح صعب عليهم هههه فعرفت الفائدة العظيمة.. بشكل عام. ..اللون احس يعطيك لوك كدا حتى لو مو لابسة ذاك اللبس ..مرا يعطي جو حبيتو مرا و زعلانة انو خلاص الشتاء رااااح لأنو اللون شتوي ماينفع في الصيف تصدقوا...ماادري بس احس انو ممكن استخدمو كمان للصيف مرا ماعندي مشكلة.
3_ كتاب " Diary of a wimpy kid" ممتع جدددداً .. مضحك مسلي شيق ..فيه طفولة لكن ممتع للكبار ..كدا دمو خفيف "Diary of a wimpy kid" هي سلسلة كتب معروفة في امريكا مكوّنة من تسع كتب
كلها عبارة عن يوميات طفل في المرحلة الإبتدائية.. يحكيها بنفسه بطريقة طريفة وهزلية ممتعة.. وكتبت عنها النييورك تايمز إنها أكثر الكتب مبيعاً
اللغة المستخدمة جميلة وكلها "slang words" أو عامية زي مانقول ..
فـ ح يفيدك لو حابة تتعلمي أكثر في لغة الشارع وثقافتهم .. افتكر مرة قبل مايبدأ كلاسي كنت أقرأ منو و شافني المدرس وجلسنا نتكلم ع الكتاب ..
قلي انو لازم تحطي في بالك انو اللغة المستخدمة هي لغة العامة فـما ح يساعدك أكاديمياً فحطي في بالك هذه النقطة .. على كل حال أنا ماكنت أبغى اتعلَّم منو قد مو أبغى اقرأ واستمتع في الكتاب ..
وفعلاً الكتاب ممتع والكاريكاتيرات اللي حاطينها طريفة خلصتو وبإذن الله راح أكمل باقي السلسلة.
4_ شامبو "OGX " biotin&collagen هذا المنتج "وااااو" بكل معنى الكلمة واو لحظة خليني اقولكم في الأول انو أنا شعري رغم انو ناعم إلا انو جاف ومتقصف ( أو بالأحرى "كان" )
وكمان طوييل فتخيلوا المعاناه اللي كنت فيها .. واستخدمت هذا الشامبو وفعلاً أبهرتني النتيجة ما أبالغ اذا قلت انو من أول استعمال تحسي بمفعول ( مفعول مؤقت بكل تأكيد بعد الشاور) .. ومع الإستمرار في الإستخدام تبان النتيجة الحقيقية طويلة المدى الجمييييلة الشامبو يحتوي على فيتامين البيوتين والكولاجين يعني أفضل شي للشعر ..
وفيه ناس أساساً بتآخذ حبوب لهذه الفيتامينات عشان تحسن من شعرها وهذا شي معروف.. بالمناسبة الشركة لها أكثر من نوع شامبو وكل نوع له مفعول معين مكتوب ع العلبة ..
انا أستخدمت هذا الموجود في الصورة وبعد ما خلص اشتريت واحد تاني .. وبالرغم انو كان زيت الأرقان المعروف وكان جيد وممتاز جداً لكن ماعجبني وابهرني زي هذا...
ربما هذا ناسب إحتياج شعري أكثر عموماً بعد ماجربتو ناوية بإذن الله أستخدم كل شامبوهات هذه الشركة الممتازة .. صراحة بعد هذا المنتج الجميل صرت ماأخاف على شعري ...
أقول مهما خرب ارجع استخدم هذا الشامبو وخلاص هههه!
5_ شمعة "Hawaiian hibiscus" من bath&body works مايحتاج أقلكم قد ايش حبيبيت ريحتها.. واضح انو ماخليت فيها شي للأسف صورتها وهي خلاص ع الآخر منتهية .. ريحة الشمعة جميلة ورقيقة وخفيفة و رومانسية اشتريتها ع أساس أحطها في الصالة لكن بعد ماشغلتها حسّيت انها غرفة نوم واسترخاء أكتر.. صرت لاااازم ع المغربية أشغلها يصير ارجع الغرفة ع العشاء وهي ريحتها جمييييلة ومريييحة كمان شكلها ولونها مرا شاعري وجميل .
6_ من اهم مفرحات هذا الشهر .. ادمننننننتها هذه الحلاوة ..
خلاص صرت حتى وانا طالعة لازم اخد خمشة معتبرة في شنطتي ههههه عبارة عن مانجو وزنجبيل ..يعني بيست كومبنيشن ولا أروع فيها لذعة وحرارة وحلاوة مع بعض .. وجيدة اذا حابة تعطري فمك... بالنسبة لي أحسن بكثير من حلاويات النعناع ..
مرا ماأحب ريحة النعناع اللي تجيك زي المعجون .. لكن هذه الحلاوة لأنو فيها زنجبيل تحسي انتعاش ورائحة نظيفة لكنها خافتة مو قوية وأجمل شي انها خيار صحي بالنسبة للحلاويات..
لأنها لا تحتوي ع الجيلاتين وفيها ٢ غرام من السكر فقط .
7_ المقطع الصوتي المفضضضل عندي هذه الفترة هي "سورة مريم للقاريء هزاع البلوشي" قبل فترة وحدة في سنابشات حطت فيديو للصوت.. ومررا دخل قلبي سبحان الله..
وسألتها عن القارئ وبحث بعدها في اليوتيوب عنو ووجدت مجموعة مقاطع للأسف مو كثيرة لكن سورة مريم إحداها.. بكل تأكيد صوت القارئ جميل في كل السور الكريمة .. لكن سورة مريم وقعت في قلبي... صرت كل يوم أشغلها في الجوال أسمعها وأحط سماعة في إذني وسماعة في بطني عشان البيبي يسمع..
متأكدة انو لها مفعول بإذن الله على طفلي..
هنا الرابط ع اليوتيوب اسمعوه...فعلاً سماع الآيات الكريمة بصوت جميل من النعيم ..
ووو هذا كُل ما لديّ... هذه كانت مفضلاتي والأشياء اللي حبيتها في الفترة هذه .. إذا سبق جربتيها وحبيتها فأنا وإنتي نتشارك نفس الذوق والإهتمامات =) فشاركي التدوينية مع من تُحبين !
No comments:
Post a Comment